مع هل الهجن الاصايل لو بغيت اسوق ريمه
ماتردد خابرٍ ريمه تبي تطلع بيدها
احتزم فوق الشداد ونيتي دايم سليمه
ومع رجال العرف في الميدان اوصلها جهدها
واترك الدرب العوج واعطى الدروب المستقيمه
أتخيّر في المماشي والعلوم ادرى نقدها
لو ماميّز في حساب خطاي ماجبت الوسيمه
ولابنيت ام الرباع اللي رفيعاتٍ عمدها
واخذ الحكمه من افواه المشاكيل الحكيمه
من يماشيهم على وضح النقا فاز بسندها
خوة اهل الدين والحكمه تراها اكبر غنيمه
طمعة اللي يطلب الامجاد والجاهل فقدها
ولايوصلك الامور الكايده كود العزيمه
والتخاذل والكسل عين الفتى يعمي بردها
مع كريمين الايادي قلّط اليمنى الكريمه
والجمايل مدها جزله ولاتحصي عددها
الردي لو مد مده مدته دايم يتيمه
بيضةٍ من ديك جت مره ويمكن ماقصدها
وان نصاك الضيف رحب به وعجل بالوليمه
كمل حقوقه وسل ام المكارم من غمدها
باشره بالطيب والدله وبعلومٍ حشيمه
وابتسم له والعلوم الغانمه سقها وقدها
وانتبه للجار عينك لاتنصيها حريمه
لاتضلي كل مابانت ولنك في نصدها!!
الخيانه يالسنافي للقصير اكبر جريمه
ياعسى عينٍ تخادع جارها يطول سهدها
والخوي حقه مبدا في التقاليد القديمه
اعرف حقوق الخوي من النشاما واعتمدها
وانتبه لاتنقل الغيبه وتمشي بالنميمه
والشهاده بالظليمه زوّر يقمح من شهدها
ولاتجي في مجلسٍ جملة سواليفه عقيمه
ثم تصير اللي تحت خفينها يبغى نهدها
ولاتقرب للعدود ام الدغاليب المهيمه
واعرف ان اللي قربها لوتحاشاها وردها
ومن برك في مبرك الاجرب يشيله في بريمه
والله لتطلع عليه الشمس ليله مارقدها
والصديق اللي ليا جت حاجته ذب الخريمه
صحبته لو انها اكبر من كرى عجلٍ هددها
واعلم ان اللاش بنته كنها الدار الوخيمه
لايغرك زينها ترى الرخامه في جسدها
زينها مثل الغطا يستر خفاياها الذميمه
واعرف انه مثل والدها يبي يطلع ولدها
واخذ حقك عن طريق الحق ماهو بالظليمه
حل بالحجه عقود الخصم لامنه عقدها
جابهه وقت المجابه وان وليته لاتضيمه
احسب احسابك قبل روحك يوافيها وعدها
وخيرها صلوا على احمد عد ماذعذع نسيمه
وعد وبل المزنه اللي برقها يسبق رعدها