تدري اني من محاصيل الرماضي والسمايم!!

الصحاري حضنها مهدي ولحفني سماها

عشت فيها اقسى الظروف ولاتعودت الهزايم

ماهزمني ليلها البارد ولا الشمس وسناها

انتصر على المتاعب بالجلاده والعزايم

ماتروضني مصاعبها صمودي من قساها

ماثني الهامه واصارع واكتسب منها غنايم

وأعترف روح التحدي والمثابر من جفاها

ماكسر عزمي وتصميمي شدايدها العظايم

ولانقص من عزتي شح الطعام وقل ماها

مستحيل ارضخ واذل النفس لك لوكنت هايم

ومستحيل انكر واقول الروح ماتملك غلاها

كان لك عندي مكانٍ في صميم القلب دايم

لك لحالك من بداية عرفنا لامنتهاها

والعشيه لو نسيتك مالحقني لوم لايم

بعد ماشفت الحقيقه وانكشف عنها غطاها

بتجاهل معرفتنا واعتبرها حلم نايم

واسقي الروح الصبر عسى الولي يجبر عزاها