انت المفوض وسو اللي تبي سوّه

الحكم لك شب والا طف مصباحي

ان قلت ابا اذبحك لعلك على القوّه

الذبح للحي واللي حيه جراحي

جسمي غطاها من الخارج وهي جوّه

ترعي منابت فروحٍ رسمها ماحي

اشبع بي الموت يارجواي ثم روّه

ان كان ماينجذب طيرك لملواحي

اطيب لي ارتاح من وقتي ومن سوّه

موتي ولا اشوف وانا حي ذباحي

من يوم مات الوفاء والصدق والخوّه

معاد يبكي حياته واحدٍ صاحي

وان قلت توك وفقدان الرجاء توّه

اقول ظلمك حجب عن تربتك ضاحي

انا اشهد انك غليظ القلب ومفوّه

سارق ومزاح والمفقوده افرا حي

خليتني للهموم السود تلهوّه

كثرت سكاكينها يوم الجمل طاحي

واليوم بيني وبين افراحي جفوّه

وياكثر ماكمّل المسرى بمسراحي

والوقت اعانك ولاسوى بي مروّه

لعب بقلبي كما لعبي بمسباحي

اسرفت بي والزمن ساندك بحموّه

وسلمتك الامر واتلا العهد بسلاحي

اللي بقالي من العمر الشقي طوّه

ياقاسي القلب موتي كسرت جناحي