الصد من خلك ليا جيت ناصيه

يشب في روض الضمير الشبايب

ماهوب شرهه من كبار المشاريه

الا كما الصفعه على وجه شايب

حتى عواريف العرب تبتلش فيه

اللي يحلون الفتن والنشايب

وانا تجرّعته ولي عام مخفيه

مخفيه وادفع لليالي ضرايب

واليوم للعذال بانت مواريه

باح الكنين وهاذي ام المصايب

ياعاذل المجروح مافيه يكفيه

صدره تصافق به زعوج الهبايب

ميدان خيل وجيش تسند وتنحيه

ورماح وسيوف وصياح وطلايب

ماله علاج ولاطبيبٍ يداويه

الا عن العالم يسوق الركايب

يطعن صدور البيد ويدّور التيه

اخير له من قول مخطي وصايب

ان عاش يفنى العمر في شكر واليه

وان مات ينسى والعشير السبايب