لمّي غيوم الزعل واسقي عروقي عتب

يزهر بقلبي قصيد ٍ يطلب المعذره

ذا مجلسك بالحنايا والنفس له مهب

وزعلك عود وقصيدي جمرة ومبخرة

البارحة طار عصفور وتدلى عنب

النوم عصفور وعنّبّي عتب من مره

كن السهر فاس كسّر من جفوني حطب

وانا على قسوته قلت اكرمه واسهره

الطيب يوخذ غصب والشعر ماينغصب

والعشق لولا القصيد يمو ت وش يظهره

مادام ذيب القصايد ف الحنايا قنب

عدّا ظلوعي رجوم وجاوبت حنجره

قلت امتطي صهوة احساسي واهيجن طرب

واشهر شعوري اليا حد السما وانثره

راح اكثر العمر جمر وامنيات وتعب

ياعل باقيه مايمضي سواة اكثره

حبيبتي والطعون كثار ماتنحسب

مافيه هم ِ ماوسّم بالحشا خنجره

جفاك كسّر بصدري كل ضلع ٍ حدب

فداك ..بس خاطري تقفين لايكسره

ايه أقبلي والجفا طال ووصالك وجب

داعي فلاح الهوى يبكي على منبره

من قال لك ذي نجوم الليل ماتنسكب

شاعرك مجنون ذوّبها على دفتره

خليني آهيم واكتب فيك شي ماانكتب

شاعرك ماشاب شِعره لو يشيب شعره

بحر ٍ نويت أعبره (بين الهدب والهدب )

يادوب هي موجة بقلبي وجاك خبره

طولك اليامن تثنا مال عود القصب

واليانطقتي ........ نقطتي سكره سكره

هزي غصون الزعل واتساقطيبي عتب

واهز جذع القصايد واقطفك مغفره