طغى وجه الظلام ولا بقا وسط المداين نور
آبطوي طاري وصالك وافل لبعدك شراعي
تعبت اسأل متى اشوفك وامد من الحنين جسور
تعبت اسامر طيوفك وانا واعي ولا واعي
تعبت افتح شبابيك الوله للموعد المهجور
تعبت أشهق مع انفاسي أنين الناي والراعي
تخيلتك مسارح شوق واحساسك وله جمهور
وهقيت اني بلحظة شاعرك وعيونك اتباعي
نشرت من الوفا نور ونثرت من الغرام زهور
انا وش ذنبي ان كانت حروفي تكتب اطباعي
أمد ايديني استنجد لقاك وخاطري مكسور
وتشر لي على فرقاك وانت هناك وتراعي
حبيبي تذكر اوجاعي هاك اللحظة وانا مقهور
ترا للحين انا مقهور واوجاعي هي اوجاعي
بعد مااسقيتني كاس الجفا هم وتعب وغرور
بعد ماارويتني فرقا تجي تنشد عن اوضاعي
حبيبي مات لك وسط الحشا من غيبتك عصفور
عجز يلحق مداك ولا رضا يستوطن اضلاعي
وشعري ماعليه خلاف وديانه تسيل سطور
مادام احساسي غيوم وسحاب ودفتري قاعي
ترى مالي حمل طعنة جديدة لعن ابوه شعور
اذا ماطاعني قلبي قسم للويه بذراعي
يقولون الكلام فما مضى به للعقول قصور
واقول عقولنا من دون ذكرى مالها داعي
حبيبي كثّر الله الف خيرك تسلم ومشكور
بعد ماذبلت ورود اللقا ذي وردة وداعي