ياجاهلِ بالمعرفة إلعن إبليس

ولاّ على راسك تدور المصايب

حنا الطنايا كاسبين النواميس

حنا الطنايا كابسين العصايب

حنا نحل مشربكات اللواليس

حنا الطنايا متعبين الركايب

حنا مناوي مرهفات الاحاسيس

وحنا هوانا بالأمور الصعايب

يومن همك بالغناء والمراويس

حنا لنا بالمجد حق وطلايب

حنا قروم المجد حنا السناعيس

المجد مع دم الشرايين ذايب

تزهر بأسامينا بياض القراطيس

وبوجودنا يستبشرن السحايب

ارزاقنا ماهي بغشٍِ وتدليس

يومن علم مورد الخد خايب

وش عاد لو قالو يدينا مفاليس

الرزق عند اللي يدير الهبايب

واقدامنا عدت وعار التضاريس

وجباهنا تعشق سموم اللهايب

وصدورنا تغلي هموم وهواجيس

لاطوّحن بالصوت شقر الذوايب

لعيون خدرات العيون النواعيس

نارد حياض الموت والخوف غايب

اليا جبرنا الكسر نضبط له القيس

وليا كسرنا العظم ماهو بطايب

وهبه من الله ماخذيناه تدريس

سبحان قسّام العطا والوهايب