ارق فوق السحايب ياقصيدي وهيم

مثل حر شلع كبد السما يوم حام

وشع كنك صباح وهب كنك نسيم

وافهق الليل ماهذا مكان الظلام

قالوا العرب في الشعر الفصيح القديم

المكارم على قدر الكرم والكرام

كل صغير بعين صغار ينظر عظيم

والعظايم تصاغرها عيون العظام

ماطرا للقصايد غير مدحك نديم

ولا طرا للمدايح غير شخصك وسام

والله اني لمحتك يوم شوفي سليم

أنت يابن الامام وياحفيد الامام

شفتك بعيني اليمنى بشاير وديم

وشفتك بعيني اليسرى رماح وسهام

ياابيض الوجه يالسمح التقي الكريم

يارفيق الصلاة وياحليف الصيام

ياسمو المراجل يالحشيم الحكيم

ياامير التواضع يارفيع المقام

يا لامير الاديب الطاهرالمستقيم

يابعيد المرام ويافصيح الكلام

كان في الشعر ورد وكان للشعر غيم

انت شعرك روابي وانت حرفك غمام

من نصالك وهمه فوق صدره جسيم

عند بابك تطيح المعضلات الجسام

كل حمل بشوفك صار مثل الهشيم

وكل حلم بشوفك صار سهل المرام

الردى يحرم لشخصك وربي عليم

حرمة الدم في البيت العتيق الحرام

ياشجاع حشا ماله ضديد وغريم

شف حسامه يسله في الملاقا حسام

ان ضرب ضربته مامالت عن الصميم

كل مايل عدل من ضربته واستقام

ياسليل الاماجد يالعطوف الرحيم

يابن مساعد الحر العديم القطام

ياهل المجد هذا المجد فيكم مقيم

وارثينه بتكوين الجسد والعظام

كان للمجد صفحةتنكتب للفهيم

يكتب آل السعود وبعدكم والسلام