(عيد على أي حال عدت فينا ياعيد)؟؟

زي ماانت!! لوعة حسافة واختناقة تعب

لي اربع سنين حزني غصة بالوريد

ابلعه جمرة غبينة واتنفس لهب

الدمع من ربكته يظهر شوي ويحيد

أثر.. أوجع الدمع.. دمع ماتعدّا الهدب

لا والله.. الحزن سيّد والمشاعر عبيد

استوطنت مهجتي وانا خيالي خصب

أورق بصدري غصن حرفي وفاح النشيد

والشعر فيني كذا.. ولكل قصيدة سبب

من يوم مات الحشيم المستقيم الفريد

أطيب هل الارض واعرقهم مقام ونسب

من مات مامات !! ذكره كل يوم يزيد

رغم انه الموت في صدق الوعد ما كذب

له في حنايا الخلايق مجد عشق ورصيد

نبض العروق بغلاه من الغلا مانضب

طلال ((والطيب يومن شح فيه الوقيد))

أشعل فتيله وكسّر له ضلوعه حطب

طلال يوم انتخن باسمه بنات القصيد

جدّد صباهن ولبسّهن حرير وذهب

على النوايف ابو نواف عزمه شديد

ذقناه للطيب نبع وللشهامة مصب

متربع ف مجلسه مجد قديم جديد

مقدمه لفظ ذهب واخره صدر رحب

حر مضّرا لصيد الطيب والطيب صيد

الطيب ماينعطا الطيب يوخذ غصب

سرى سرى ذيب شمر مالقاله ضديد

عدّا رجوم المكارم والشيّم والادب

رقى بفعله تقول انه تعّلا وحيد

هام االسحاب وتعدّا للنجوم وقرب

عجز يطوله لقب من كثر ماهو بعيد

ماهو بهذا الذي يلحق فعوله لقب

ماهي بلحية لقب بس قل .. طلال الرشيد

الجود ينزل سحابه والمراجل تهب

ياالله..يالواحد الفرد العليّ الحميد

يامنزل الغيث فينا يامزيل الكرب

يامستجيب الدعا يالفاعل لما يريد

اغفر لعبدك ويسّر له حساب صعب

ظلّه بظلّك وهب له عيشٍ عزّ رغيد

انت الكريم العظيم الجزل يامن وهب