بديت بأسم اللي له الخلق تنقاد

ربٍ وسع في رحمته كل هالكون

رب الملا يغفر ذنوبي ليا راد

واليا قضى بأمره على كاين يكون

يامن وفد لجله جماعات وافراد

من كل فج وكل عام ٍ يحجون

يالله دخيلك عن ردى حظ ماجاد

وقلبٍ قفص صدره للأحزان مرهون

صار ابسط احلامي على يد حساد

وصرت ارقب اللذات بعيون [ مسجون ]

والصدفه اللي (خير من الف ميعاد)

رحت اتغانمها ..وعودت مديون ؟

حظي رماني بين عدوان واحقاد

وناسٍ على نغمات حزني يغنون !!

حتى الذي لاجله تحملت الانكاد

اللي من اجل رضاه.. حاضر وممنون !!

اللي معه كنت امشي الدرب منقاد

وابحث عن اللي يسعده وين مايكون!

ضحيت لاجل رضاه بوجيه الاجواد

اللي من اجل رضاي دايم يضحون!

راح وتركني في ظروفي ولاعاد

ترك العرب للقدس بيدين شارون !!!

اقسى من العالم على شعب بغداد

واحقد من الكافر على اللي يصلون !!

ياما عطيته من حناني ولا فاد

اهديت له قلبي وجازاه بطعون !!

جازى وفاي بكل نكران وعناد

خان الوفاء واقفت خطاويه بالهون

اخترت عن قربه سهر ليل وابعاد

تبرى الجروح او جعلهم مايطيبون

رح علمه صدق المواعيد يابجاد

وقله بعد وشلون الاحرار يوفون

وقله تبدل ليل الاحزان برقاد

وتبدلت ذيك التناهيد.. بلحون !!

حتى يعرف ان الغلا زال مازاد ؟

!ويعرف خطاه ان كان له قلب وعيون !!