ساقت مشاوير الشقاء .. واردف الليل

وسريت .. ودروب السهر سرمديه

ازريت اسوق الهم .. واحط .. واشيل

وتعبت اكابر... والمواجع نديه

الحيل مل من التعب .. مابقى حيل

والجفن.. ماله بالسهر مقدريه

البهذله .. والمهزله .. والغرابيل

ابطال ... وسنين العمر .. مسرحيه

والهم.. والحرمان .. والحزن .. والويل

ضيوف .. وجروح الوفاء .. شاذليه

والصمت ..والهوجاس ..بوح التعاليل

والخوف مسرى.. والليالي مطيه

يالله عسى درب السنع بالمقابيل

والا .. الليال اللي مضت جرهديه

حرٍ كفخ .. واستأسرته المحابيل

وعقب السماء الرحبه هوى للوطيه

حرٍ غدرفيه الزمن والمداخيل

مقرود وكفوف العطايا رديه

غلطة عمر منها جنيت البهاذيل

ذنوب غيري حطها الله عليه

غلطة .. ودحدرها القدر بالمحاصيل

ورضيت بالمقسوم غصبٍ عليه

تناقلتها شلة القال .. والقيل

وحطوا عليها لين صارت .. قضيه !!

وقامت تناهشني رخوم الرجاجيل

اهل الملامه .. والعلوم الرديه

اللي تجيك اخبارهم بالتفاصيل

ويحرفون الهرج عن سوء نيه

بالله قل لي ياسود الوجه ... ياليل

وضح النوايا .. كيف صارت خطيه؟

قل لي .. من اللي ضلل الحق تظليل

ومن علم الوافي يخون بخويه ؟

ومن بروز الاوهام .. خدعه وتمثيل

ومن طلسم الواقع ؟ وخان الوصيه ؟

من قال لي.. دربك مهود..وتساهيل

ومن علم الضحكات تمشي عليه !!؟

اللي قتل حلم الضلوع المناحيل

وقال انقتل فيك العوض والبقيه !!

جاوب سؤالي ياسود الوجه ياليل

وضح النوايا .. كيف صارت خطيه