يامرحبا ترحيب وافي..ومدبول

ترحيبةٍ وسع الفياض ..وبحرها

ترحيب لا هل العز ..والطيب مرسول

اعداد ساعات الزمان ..وشهرها

واعداد مايعجز لساني ..عن القول

عن شكر ناسٍ..ماوفى..لو شكرها

واعداد ماسجيت.. والبال مشغول

بأسباب.. فرقا اللي حياتي دمرها

واعداد شوقي له من الحول...للحول

وانا اتحرى جيته... وانتظرها

في شاعرٍ..ساق المعاني على وصول

يشكي من اهوال السنين..وكدرها

جاني وقلبي ممتلي هم...وغلول

ولمّ..الهموم..وفوق همي زبرها؟

باح بحقيقه صمتها كان...مذلول؟

أعظم جريمة قتل ...وأبشع صورها؟!

وقصة(بري عاجز)بالاغلال مكبول

اخفى حقيقتها الزمان ...وسترها

وسرابي الهاجوس ..والقاف معسول

وحضّرت عفريت القصيد..وحشرها؟

وبديت اسطرها ...بلا جهد مبذول!!

نوب اتعاسرها...ونوب اعسرها؟

يامرحبا بك جيت.. والحبل مفتول

وجيت انقضه؟واتبع بقايا اثرها!!

اصبر عليه...واستمع كل ماقول؟

واحفظ وصية شاعرٍ ماذخرها

شاعر يصول بجبهة الشعر ويجول

وليا انكسر وزن القوافي جبرها

خيّال كان الشعر له ركب ..وخيول

وادمح خطأ ناسٍ....وناس أحتقرها

يوم ان غيري عاش محفول... مكفول

عشت الظروف..بخيرها...وبقشرها

وماهنت نفسي عند ذولا...ولا ذول

صاحبت بالدنيا سرابيت ؟...وزحول!!

وبعض الوجيه بنظرتي ماعتبرها

ماكل ماتسمع من الناس.. معقول

وماكل من شاف الحقيقه...ذكرها

وماكل زرعٍٍ لو سقي منه محصول؟

وماكل شجره..ينجني من ثمرها!

كم عاقلٍ عقب العقل..عاش مهبول؟

وياما رجال...الوقت جار وسطرها!

وكم سطّر التاريخ فارس..ومخذول؟

وكم عز نفس..وكم نفوسٍ ثبرها؟

للحكم عقل..وللوغى رجال وعقول؟!!

وللخيل ركب..وللمساري سهرها؟!!

وللسلم حلف...وللقى سيف مسلول؟

وللخوف ضعف..وللمنايا قدرها!

ومن ديرة المنفا..الى دار ابا الهول؟

تبرق سماها ..والرعد مصتقرها؟!

من علّم الاطفال بحكاية الغول؟

واذهل فلذات الكبود...وذعرها؟

ضاعو رجال العرف..في زحمة خبول

وراحو صناديد الرجال...بخبرها؟

يابو هجر..زندي من الدمع مبلول

ونفسي عن احلا مي زماني عسرها

دروبنا يابو هجر مابها وصول

وعزومنا .. ظيم الليالي كسرها

والدار غربه..والوطن صار معزول

نكبة زمن؟...واللي عمرها دمرها!!

قبلك صبرت وباب الا فراج مقفول

وطالت مشاوير السهر في سهرها

واصبحت في واقع متاهات..مذهول

وعجزت اميز شمسها.. من قمرها؟

تلعب بي الدنيا على كف مسطول؟

اغدى الدروب...وللمهافي حدرها؟!

مدري صباح احلامنا مات مقتول؟

ولا انتحر صبح الفرج...واختصرها؟

لكن على الدنيا سلامي ..وياحول؟

صكت علينا خدوشها...مع قهرها

وماقلت يكفي بس ابعيد.. واقول

نكبة زمن...واللي عمرها دمره