على الله يامشاوير الضياع وعثرة الاقدام

يعين الله على عوج الدروب وباقي ايامي!!

على الله كل ماشان الزمان !!وخانت الايام

على الله كل مااشوف الطريق يظيق قدامي

على الله كل ماصدري يظيق وخاطري ينظام

على الله.. كل ليله حزنها يعزف على انغامي

مقدر ياشقا عمري اسير برحلة الاعدام

واضم بداخلي نار الخفوق وجمرها حامي

حزين.. ولامعي غير الجرح.. ولوعة الاعوام

على وجهي تقاسيم الضياع ..ونكبة اعوامي

حياتي كلها رحلة غموض .. ونقطة استفهام؟

طلاسم خطها كف الزمان.. لعثرة اقدامي

بقالي من مسافات السنين المقفيات حطام

بقايا امنيات.. وحسرتين "بسلة حطامي "

بقايا طفل رافقه الشقا من يوم عمره عام

تحدته الليالي والظروف وعاش منظامي

غرير لاكسا الكون الظلام.. اطفا السراج ونام

وصحى يحلم متى اكبر.. كبر ابوي.. وباقي اعمامي

عنيد.. ليا زعل شق الكتاب.. وكسر المرسام

وجلس يصرخ عبث .. وين الكتاب؟ين مرسامي

شجاع ..!! مارضى يصبح ذليل ولارضى ينظام

رغم "كبر الظروف" وصغر سنه "موقفه سامي"

قدر يرسم بصفحة دفتره (قلب ) و (وطن) و (اعلام)

وكتب فوق العلم [عاش الوطن في ظل حكامي]

حفظ من ربك؟ الله لاسواه!! ودينك؟ الاسلام

ونبيك؟ هو رسول الله محمد خير الانامي

يمر العمر وتمر السنين برحله الآلآم

وجروحي تشرب اوجاع العذاب وخافقي ظامي

كبرت .. وكبر همي .. والجروح وكبرت الاحلام

وطموحي هو طموحي يازمن واوهامي اوهامي

نسف كف القدر رجم الطموح وبعثر الاوهام

وتلاشت مابقى غير القصيد .. وجرة اقلامي