قبل ما حُطّ بكفوفك بقايا عقدي المقطوع

أبكتب آخر أشعاري عشانك لو تبي تقرا

تراك آخر مواجيعي ولا بَعْك عطش ودموع

لمينْ أظما وأنا بَعْدك هجرت النبع والمجرى

تعال إقرا عن البارح سَهَرْت إبْلا وطن وشموع

أدورّ وجهك المهموم وأدوّر للحزن مسرى

أبحكي عن كتاب فيه هواك الجرح والموضوعوي

وعن إسمك على صدري قلاده وسْطها جمرة ؟

عن الشكوى عن النجوى وعن صوتٍ غدا مسموع

يناجي في عتيم الليل نجوم الكون والقمرا

أبشكي لك رسايل شوق لها نفح غدا مطبوع

وحبرْ ريحته عطركْ يجدّد لوعة الذكرى

أبحكي عن عذاب الأمس وجسمٍ ناحلٍ موجوع

وروح خالَطَتْ روحك مشاعر صافية عَذْرا

تعال إقرا عن الطعنة شعور العاشق المخدوع

أنا جيتك لجًل رْوضك لقيت بداخلك صَحْرا

ألا آخر الأحباب أنا بَعْدك نَفَسْ مقطوع

رحيلك موت أيّامي أيْا خوفي على بُكْرا

تفضّل مابقى عندي سوى عقد وبقايا دموع

وكلمة باقية بالجوفْ أحبك حيل وإنت أدرى!