كايدٍ بُعَدهْ على قلبٍ هواه

خانقٍ شوقه ضلوع تحتويه

جيتْ وحدي والظما فوق الشفاه

والمدامع والجوارح تحتريه

جيته أسأل عَنْ شعور ما رفاه

سَيّبَهْ متْشَقّقٍ مِنْ يرتديه؟

لا تركني ويش أسوَّي باَلحياه

وي قلب مَيّت بالحشا مِنْ يشتريه؟

هُوْ حبيبي ما عَشقْ قلبي سواهَ

كَلّ شوقي خافقي ضعفي يبيه

كم لفاني طيفه الغالي وتاه

بالدجا سافر ونبضي يرتجيه

راح عَنّي تاركٍ ذكْره وراه

ذكرياَته وحدها تشهد عليه؟

ذكرياته يوم أنا وحدي معاه

في دفا كَفّه حقيقة ذِبْت فيه !

كان له حُبٍ بقلبي ما حواه

عالمي والكونْ عَيّا يحتويه ..

بُعدهْ اللي ذابحٍ ثورة هواه

ساكنٍ بديره ولا أقدر أجيه

مير حبه باقيٍ محدَنْ محاه

عارفة ماله بها لدنيا شبيه

ما نسى قلبي حبيبه ما نساه

لو نسى كل السعادة ما نسيه

أهجر العالم جميعه ماعداه

أعشقه وأهواه وأشتاق وأبيه

الزمن غَصْبٍ على نفسي خذاه

والمصيبة ما يأسْت واحتريه

أنتظر يبرق على ليلي سَناه

أتمنى وأتمنى ألتقيه !