قال الذي بيّن من القلب مكنون

في حنكة(ن) بالصدر ما بان لحذاك

إترك عشير(ن) عشرته يوم أو دون

ثمّ(ن) يبدّل بك عشير(ن) وينساك

إشتف قطاميّ على السدّ مامون

درع القفا ما ينهض الراس لعداك

اللي ليا اوحى فيك ناس(ن) يقولون

حامى على عرضك ويدمح خطاياك

أنا رفيقي لو يجي دونه الدون

ما أنساه لو اني على حوض الادراك

يستاهل البيضا والاخيار يوحون

والا الردي خلّه يباري بيسراك

شم للعلا واترك هوى كلّ مزيون

لا تعتني بالغيّ يازبن من جاك

ترى الهوى ضرب المعادي بمسنون

ورّد(ن) على التالي إلى قام ينخاك

وترى الهوى في يوم طاعن ومطعون

بيوم(ن) تغاب الشمس من كل الافلاك

هذا الهوى يعتزّ ربعه ضحى الكون

فعل(ن) وبه نعم(ن) الى قيل يقراك

ياعبيد خذ مني من القول موزون

واسلم ودم ما غرّد الورق بالراك