ان صاح صياح الضحى براس القاره

وغارت على حص الوبر عدوانها

الجيش زرفل والجموع انحازت

وعيت على المدب عصت عيانها

وحنا لحقنا فوق قب قرح

كله لعين البل وحلو البانها

وش عذرنا من دون حلوات اللبن

لاضيعت بالمعركه حيرانها

لامن عج الليل ثولا دونها

ورمت تواديها تحت اثفانها

انا على قب قحوم قارح

خطر على الحنكان من ذرعانها

اليا تلاقى ذيلها مع راسها

تسمع ضريس ضروسها بعنانها

كن المعارف يوم تنهض راسها

ثليل عذرا كاسين امتانها

تثلث على رجل تقل مكسوره

حليت عيدان السلم سيقانها

يالصانع البيطار واسمع مني

دع بالك المسمار يخطي شانها

الله ياقاها نهار الهيه

من عين رماي حفظ علمانها

مع سربة يذهل لميع سيوفها

وقصارها تلوذ في فرسانها

والموت معهم وارد ومصدر

والروح كنه واقف ديانها

كم واحد بالقاع يسهج طايح

عليه بيض حرقن اوجانها

وياما طرحنا دونها من فارس

عقب الشجاعه ياكله سرحانها

ترعى بنا العر ويكبر نيها

وننزح العدوان عن حدانها

وننزل بها في كل وادي مخضر

ترعى وسو الموت عند اركانها

في نجد نرعى مانعلق عاني

بسيوف هند ماضي برهانها

يشهد لنا وادي الرشا بافعالنا

وتشهد لنا نجد وحصى ضلعانها

قول بلا فعل عيب واضح

والصدق ما يمحاه طول ازمانها