سرنا لينبوع الصخا مكرم الجار

اللي سعى لرعيته بالصلاحي

نقاض مايفتل حيول وامكال

يصمت ولو هو يسمع العلم صاحي

جبنا له الي كنها ظبي الاقفار

مركوب من يروي شباق السلاحي

واقبل لنا بالعلم واقفى بالدويدار

وجانا من الافندي جواب قراحي

قالو جواب لا حكي به ولا صار

الله يعين اهل العقول الصحاحي

جانا بعذر وقلت انا الرب ستار

رزقي على مذري هبوب الرياحي

الرزق ياتي مثل هتاش الامطار

ماله مصك ولاش دونه سلاحي

ان كان تسمع من اهل الكذب والعار

ودع بنا رازق خفوق الجناحي

عندنا على هجن من البعد ضمار

من القفل يشدن النعام المداحي

تودع حصا الرشراش بالدويطار

الا ونقدع روسهن باللواحي

خذو عليهن ساعه وقم مغوار

وعن الوعر عطو بهن السماحي

كم ليله سرنا على الهجن ومهار

نطلب من الي خزنته ماتباحي

حنا كما حر مرابيه الاوعار

يشهر ليا شاف الجفا عنه راحي

حنا مسقيه العدو كاس الامرار

ومعشيق بالضيق برق الجناحي

ياما نزلنا منزل غب الاطار

السبر ينطش والجهامه ضواحي

كم ذود مصلاح على رعي الاقفار

ناخذ قلايعهن بروس الرماحي

والطرش جاك مشوح عقب ماذار

هج الحلال وغثبرو بالصياحي

فزو من المجلس على شبه النار

تناولو سلم القوايم صحاحي

لحقو عيال ماتمالو بالاشوار

ضارين في نثر الدمي بالرماحي

وكم خير في مطرد الخيل قد عار

هدات حر تعجب الي يناحي

ياما حديناهم على الموسم الحار

من ضرب ربع يبعدون المناحي

كان الخطا منكم ثنينا لمعذار

وان كان منا طالبين السماحي

مابيع ديني بالخدايع والافجار

المال يذهب واخر العمر راحي