كنت أنا دايم أقضي أغلب أوقاتي كتابه

أو قراءة شي مسلي..وأغلب الوقت لـ نزار

وأن شعرت الوقت ملني..وإلا مرتني الكآبه

اخذ الجيتار وأعزف أحلى لحن لـ كورتزار

وان بكن لاوتار مني,وشاقني الحزن وعذابه

أرمي لجيتار وارسم..لوحة لأطفال صغار

أرسم أشجار وبحيرة...كوخ وأزهار وسحابه

ومن بعيد هناك ألون سكة تعانق قطار

بعدها أوقف لبرهة وأمتدح نفسي بغرابه:

والله انه لو بيكاسو شافها..مني يغار

يعتليني صوت غنى من عذابه..من عذابه

منهو بس غيره عبادي .. بعثر احساسي بمرار

أرمي الألوان عني فجأة داهمني غيابه

فجأة حسيت إني وحدي وأصبح العالم دمار

مرني الهم بثواني..هزني بليا ذرابه

جرني لجرح دفنته أو ركنته عال يسار

وابتدت رحلة عذابي...أسئلة تبغي إجابه:

ليه غاب؟وكيف بعده أشرقت شمس النهار؟

هو أنا وحدي أعاني؟وحدي ضيعني ذهابه..؟

وإلا هو مثلي يتألم يبكي بكل انكسار..

مالقيت أية إجابة والألم سديت بابه

أكتشفت إني أضيع وقتي بكل اختصار

خل أروح أفتح كتاب يمكن يزيح الرتابه

أو أرد اعزف وأدندن بأحلى لحن ل كورتزار