أحب امشي على سيفك أداعب موجك الثاير

وابني بالوهم قصر وأسكن فيه أنا لوحدي

وأكتب اسمك الغالي وماله بالمدى أخر

وأنقش كل حرف في بإحساس الهوى الوردي

وأحب أقرا مكاتيبك وأذوب بعطرك الهاجر

وتمحي دموعي كلماتك وتتمايل على خدي

أطالع بالسما طير بجنحانه الفرح طاير

وأتخيل أنا نفسي وجنحاني كثر وجدي

كثير أسرح وأنا أتأمل نجوم الليل وأتفاخر

أقول نجوم هالدنيا أقل بكثير من ودي

وأسمع صوت جيتاري يناديني وأنا حاير

نسيته وكل أوتاره تصيح اليوم من فقدي

سرقني صوتك وسافر وبعدك أكسر الخاطر

هجرت أحلى هواياتي وملت ريشتي بعدي

تناديني فساتيني عطوري وكحلي الساهر

وحتى أتفه أشيائي في بعدك تشتكي صدي

وإذا مريت بالصدفه ولمحت مرايتي تناظر

أناظرها وأسألها حبيبي ليه نسى وعدي

وادور صورتي فيها أشوفك تبتسم ساحر

ونظراتك مثل خنجر تصوب سحرها حدي

وتجرحني تقاطيعك وتبريني وأنا صابر

أحب الجرح في حبك ومايكفي بعد ودي

وأرد امشي على سيفك أداعب موجك الثاير

وأهدم بالوهم قصر بنيته للأسف وحدي