بين الليالي والنتائج تضارب!!

واكثر سؤال الناس: ( هالوقت وش فيه؟)

اخذت من وقتيْ استراحة محارب

من ما مضى باخذ عِبَر لجل تاليه

الوقت ساعه .. والضروف العقارب

احيان تِزْعل شخص واحيان ترضيه

وانا ..؟ كِثِر ماصادفتني تجارب؟

اضيق من وقتي وشعري يغنيه!

ياليت قلبي للحزن سد مارب

واهين حزني وسط الاضلاع واخفيه

طال الزمان وشان وجه التقارب

وبايامنا ضاعواْ المداوير في التيه

تصفي ونوب ايغثبرن المشارب

واللي يصدّر لو صبر عنه ياتيه

احدٍ يصدّر ماشرب واحدْ شارب

واحدٍ يجي نص الدلو واحدْ ماليه

ولضروفنا .. حدب الحنايا مضارب

من كثرها تهنا بوسط المشاريه

لو مايشيل السمّ غير العقارب؟

تضائل المكروه وامكن تلافيه

اضروفنا تفتل علينا الشوارب

وحنّا ماوالله نسال اضروفنا ليه!!

والادمي في العسر يبغى المهارب

درب الهروب ابغالي السعر يشريه!

امنيّة الغرقان في البحر ؟ .. قارب

واذا نجا للبر .. زادت امانيه

فينا عذاريب وبالايام ذارب

والادمي يُنشد عن اللي يسويه

احيان في وجهك جماعتك .. غارب

والاجنبي وجه السَعَد يوم ترجيه

ليت الاجانب بعض الاحيان اقارب

لو كان ابن عمّك ليا جاك .. تعطيه