ياللي سليتي معَ غيري وخنتيني

واكبر دليل الجحود اللي ماهوْ عاده

رفعت شخصك على الهامات بيديني

وانكرتي الفضل دون إشعور وآراده

يالجادل اللي رسمتك في عناويني

ياللي تفرحك مني اطرف اشاده

اليوم ماعاد اهمك يامنى عيني

من يوم قلبك لقى مع غيري مراده

الله يقنعك خيره يا اطهر سنيني

وعسى الهناء يا اطهر انسانه لك وساده

حاولت ألبي مرادك يوم ترجيني

لكن لي سلوم تحكم سيّد وساده

وإليا بغيت اثني سلومي تثنيّني

بلشت بينك وبين القلب وعناده

احب وازيد قسوه لو تحبيني

وازيد قسوه ليا زاد الهوى زياده

إليا سفهتك حذاري لاتناديني

وان فح قلبي بعد مايسفهك ناده

واذا تأخرت حذرى لاتلوميني

وقت الزعل كل واحد يقضب عتاده

وان شفتي السبحه البيضاء في يميني

في وقتها خافقي اطيب لك بعاده

وإليا انشرح خاطري تعالي اخذيني

اعطيك قلبي وراع القلب وشداده

قلْتلك هذا ولكن مافهمتيني

وخليتي القلب يقدح زنده زناده

تعبت واتعبت قلبٍ كان هاويني

الحب ياغاليه ماجاز مقعاده

بعذرك وابغى العذر وإليا بغيتيني

في حاجةٍ عارضه عاد الوفا عاده

وإليا اغتنيتي عسى مولاك يغنيني

وكلٍ يعيّد ليا عادت له اعياده

روحي مع اللي هواه إبلا قوانيني

الله يهنيه في حبك ليا ساده

والله يعينه يوفّي كافي الديني

الله يعينه على هواك وجهاده

لني اعرفك يسابق جابتك سيني

والحق..لك بالوفا رايات ورياده

اذكر امسيك بالورد وتمسيني

ب ليه ولماذا وللرغبات منقاده

هذا وعسى الله يجمّل حال الاثنيني

يومٍ حكم حكم رب الكون بعباده

الله يسمح دروبك يامنى عيني

مدام قلبك لقى مع غيري مراده