يا ليتها فيني ولافيك يا [ديم] ..!

يا جنةٍ ربي خلقها من الطين

ياثلجةٍ طاحت عليّه من الغيم ..!

بحفظك في راحة يدي ماتذوبين

في الليلة الحمرا المخيفه ثنى الظيم

تربّع بصدري وقال : " الوتر وين؟ "

وغنّى وسط صدري (فراق المعازيم)

ضرف القدر جمهوره وحظّي الشين

طالت بي الليله وانا ماني ابنيم ..!

واقول : عن ليل الاحد وين الاثنين ؟

لو انّها بكيفي عليّ الملازيم

ماتتعبين شْوي لو اتعب سْنين

ياطفلتي لك في خفوقي مراسيم

من يوم جيتيني قبل عام للحين

ارْدي على قلبي مثل موْرِد الهيم

بجذب لك الجمّه غلا لين تروين

ياديم من حزني قلبت المرازيم

كن قلبي اللقمه والايام فكين

احيان قبل اذن من الهاجس اُقيم

يلعب بي الهوجاس لعبة وراعين

(ثوب الجِراحه) يجرح القلب ياديم

شفته عليك وهلّ دمعي من العين

لو انّها بكيفي وانا ابوك يا [ديم]؟!

فديتك ابكل البشر غير (الاثنين)