الناس شاطئ والصُدف مثل الامواج

وياليت للشاطئ يدين وعراوي!

واللي مايضحك قلب .. لو يضحك احجاج

عسى صديقي عنه دايم غناوي

في اليسر يمكن لو تبي اللول والعاج

ياصلك من كفّ الغنيّ الرهاوي

لكن ماتدري لو يضيقنّ الافواج

وش موقفه لاكلبنّ الشكاوي

واللي عطاك اشويّ وهوّه محتاج؟

هذا صديقك في اليسر والبلاوي

وان كان ماشبّيت في ليلك اسراج

سراج غيرك مايجي بالمناوي

وهرجٍ بلا معنى على لْسان هرّاج

ان كان مايجرحك ماهو مداوي

اخير لك صمتك ليا عمّ الازعاج

وفي الساعه السهله ياكثر الحكاوي

والضيق درسٍ ينفعك بعد الافراج

في الضيق تعرف صاحبك وش يساوي.؟

واللي حزامه في اللقاء سلك ديباج

الله لن ما اقواه ماهوب قاوي

والصدق فوق الراس يبلص كما العاج

والكذب دربٍ في دجى الليل هاوي

الكذب علّه .. كلّه قيود واسياج

ولايتبع الكذّاب ياكود غاوي

ولافيه علّه مالها طبّ واعلاج

يدري بهاْ الله لوجهلها المداوي

والقرص مايشكى على خدّة الصاج

والصاج مايشكي لو الجمر شاوي

رتبتها ياجعلها تِسْعد احجاج

قصيدتي .. الجمهور والله ما ياوي

بينك وبين النقص قفلٍ ومزلاج

اكيد والا ويش ابي بالحراوي

قافٍ وله معنى والافكار حجاج!

الجوع والمرقاب والذيب عاوي

ماينفع الجوال من دون الابراج

وشعرٍ بلا معنى خساره وثاوي