مابيك تربحني وأنا مأبي أخسرك

مابيك تذكرني وأنا مأبي أنساك

مابيك تجرحني وأنا مأبي أكسرك

مابيك تسمعني وأنا مأبي أقراك

مابيك تعتقني وأنا مأبي أنحرك

وأنت الضحيه وأنا باقي ضحاياك

ماني على طولك ولاني على أقصرك

أدناي أبعد بالمسافه من أقصاك

من قبل أضمك بالحشا هم وأذكرك

حزن وتوّقد بين الاضلاع طرياك

دوّر نصيبك : يمكن الحظ ينصرك

على صديقٍ صار واحد من أعداك ؟

ماهو غريب أن التناقض من أصِغرك

لكن غريب أني صراعات لرضاك

مابين أجيلك منتظر لحظة الِترك

شتان : مدري من يسوي سؤاياك ؟

طعنت وجداني بكذبة مشاعرك

وأحساسي الصادق ضحية نؤاياك

أيام كنت لموقف الضيق ذاخرك

جبر الخواطر كسرها عند شرواك

ولابد مايومً به الوقت يخبرك ؟

أن المواقف ترجمت فعل يمناك

ومابيك تربحني وأنا مأبي أخسرك

مابيك تذكرني وأنا ودي أنساك