الندم وطعون الايام والوقت وعناي

كل مالديت وجهي شفتها تبرالي

آه وجرح قلبي كل ماقبل مساي

من همومً بصدري بالحشا تجتالي

آه ياهم روحي يوم جال بحشاي

وأنفجر بالحنايا وأبتدى زلزالي

كل دربً مشيته ماوصل منتهاي

تعترض في طريقي صدمتي بظلالي

لين تعبت أقدامي بين رايح وجاي

أدري أنه أهّبال ومقتنع بهبالي

أحسبنه تعدل كل مايل عصاي

لين طاحت عصاتي وأنكسر تمثالي

والطعون اللي من الوقت تستعذب عناي

قصة أطعون غدرً سامرت موالي

سود الوجّية اللي بالخفا من وراي

بالقبال أصدقايه وبالقفا عذالي

أقرب الناس صارو بالمواقف أعداي

ماحسبت الخيانه وماخطر في بالي

أن زيف الصداقه هو سبايب بلاي

بسم كلمة صداقه وش جرى في حالي

كنت أداوي أطعونه ؟ وأنطعنت بقفاي

من طعني صديقً لا نطعن يلجالي

شوف ماأوسع أطعونه وين أبلقى دواي

طعنة الغدر خنجر بالحشا قتالي

لعنبو هاالصداقه لا لابو أصدقاي

ولابو زيف المشاعر ولابو قلبً خالي

لابو طبع الضعافه ولابو حتى رجاي

دام كأس المرارة شربته تصفالي

ويلعن الشعر كنه يوم ياصل مداي

معجزات القصايد وشامخات أمثالي

مالقيت بحياتي من يقّدر وفاي

كل ماقلت هذا ؟ طاح من رأس عالي

بين صدمة صديق وبين صد أقرباي

رحلة العمر غربه طعمها يحلالي

والندم وطعون الايام والوقت وعناي

كل مالديت وجهي شفتها تبرالي