إنحدر نور السماء كن البحر جر النهار لوسط غبه

وأظلمت كن السواد إبل ٍ مجاهيم ٍ تعدى فوق راسي

لي ثلاث أيام تشغلني هواجيس الشعر لين آتنبه

بأني أشغلت الورق بالحبر وأبعدني عن أحبابي وناسي

ديرتي يوم أرضها ينبت بها دلال وفناجيل ٍ نصبه

للغريب اللي هقى بأن ماله أقراب ولقانا تقل ناسي

يا عروس ن وقفت عند المرايه قالت بمين آتشبه

قلت زيدي حمرتك صيري مثل شمس إغربت قبل النعاسي

ريحها قيصوم لا هب الهواء فاح وطعمها تمر جبه

عشبها ينبت فخر وأمجاد وسلوم وكرم قوم متواسي

السماء تمطر على الساكن غلا والطرقي سرور ومحبة

والصدور وساع والخوه على وضح النقا والراس قاسي

والكلام أحيان ما يوفي حقوق ديار واللي ينكتب به

هاجس ٍ راود خيال الشاعر اللي داخلي وأشعل حماسي

كل ما طالت سوالفنا على حايل وهي سبحان ربه

تورق غصونه حلى والورد ينبت لي ما غطى مداسي

يا أجا سلم على سلمى وقول إني على منت بتحبه

راجع لديرة هلي حايل بعد حيي وأنا في قو باسي