المسافة وضيق الوقت وأشواقنا

والكلام ووجيه المقبلين السمر

والسؤال الوحيد اللي من أعماقنا

ودي أسأله قبل إن الدقايق تمر

القدر أو ظروفك أيهم عاقنا ؟

قللي إن كان باقي لي بعذقك تمر

حسبي الله على اللي سبب فراقنا

ما رحم وقفة الذل وعيوني الحمر

كل ساعة تعدي تخنق أعناقنا

كن حروفي حفاة وأرض وقتي جمر

تدري اليوم جالس احسب أوراقنا

من يصدق تفارقنا بعد هالعمر

تذكر آخر لقاء والدمع وعناقنا

كيف كان المكان بشوقنا منغمر

خايف إن الزمان اللي قبل ساقنا

للجفا يعجبه ما صار ثم يستمر

وإنت روحي وأنا من ليلة فراقنا

أنتظر في مكاني كل ليلة تمر