الشفق جرح السماء بإيد الغروب

والسحب منديل طيره الهوى

والشجر حارس على كل الدروب

ماسمح للريح والنسمة سوى

والذنوب اللي نسميها ذنوب

ضحكة الساقي على ورد ٍ ذوى

وأنت شمعة عاهدتني ماتذوب

لين ما آحس العمر كنه نوى

إلمس بيدك على صدري ب صوب

حس في صوت الفؤاد اللي دوى

ليت لي كلمة على كل القلوب

كان ماخليت قلب ٍ ماهوى

وليت لي قدرة على نفسي وأتوب

كان ماقلبي على بعدك قوى

كل مافي الكون خاشره الهبوب

غير صدر ٍ ضم حبك وإنزوى

كنت اخاف إليا طرى ذيب الهروب

يفلت بفكري وإلا أبعد عوى

ويزعج النايم على رجل العيوب

وأمسكك وآحس ثالثنا غوى

وأتركك وإبليس في وجهه شحوب

لأنك أطهر من بالإخلاق إرتوى

قلت لك سبحان علام الغيوب

كل هذا الكون شفته بك ضوى

الشفق خدك وسجداتك غروب

والسحاب جلال بالليل إنطوى