اخلك رزين ولا تكّثْر كلامك

بعض الحكي لا زاد جاب المناقيد

وارفع علومك لا تنزّل مقامك

لكل من يطلق لسانه بلا قيد

اذا عَقْل عقلك . بيدك لجامك

وذا رخي ولا فلت تهت فالبيد

صلاة فرضك خلف تنوي صيامك

والصوم جُنّه وآخره فرحة العيد

يعني قبل قولك يكون التزامك

بالعقل والمنطق وفعل الاجاويد

واحذر سفيه الراي يبري سهامك

إلين ما تخطي على زيد وعبيد

وفي الجدال اياك تشهر حسامك

كثر الجدل ما فيه مكسب ولا فيد

الصمت نعمه . من على الصمت لامك؟

الا شهادة حق تحتاج توكيد

اشهد بها والناس تالي اهتمامك

تبري بها ذمتك يوم المواعيد

والنطق نعمه لك من الله دامك

تسخره فيما يجملك ويفيد

اتبع نبي الله وخله إمامك

وختامها بنهي بمبداي واعيد

خلك رزين ولا تكّثْر كلامك

بعض الحكي لا زاد جاب المناقيد