قالوا ابتعدنا ناويين القطاعه

لاوالله اني ما نويت ابتعد عنك

ولا جا على بالي اخليك ساعه

لكن ظروفي خلت القلب في ظنك

الوقت وادي والمصاعب سباعه

وان كان ما تطعم سباعه توطنك

طعامها لو كان عندك بضاعه

ولا دراهم في حسابك على البنك

ولى زمان المرجل والشجاعه

اليوم ضاع الصلب في عالم الزنك

ان كان مالك دخل ناقص مناعه

اصغر ظروف الوقت والله يجننك

مهما حصل فالصبر لي به نفاعه

يا قلبي اصبر لين تاصل لمدفنك

لا تشتكي ياقلب خل الجزاعه

واطلب من اللي هو قدير يعاونك

يسبغ عليك الصبر فالصبر طاعه

طاعة ولي الكون هي واجبه منك

لازال ابو نوره على اوفى طباعه

ولا زلت احبك يا هوايه واثمنك