أطول من الليل .. هذا الصمت، هذا الملل

والنوم بيني وبينه ساعتين ونهار

معزول، والعزلة اللي صدق ماتحتمل ..

اللي تجي لك بلا رغبة ودون اختيار

أكتب جمل في جدار الصمت وامحي جمل

أهرب من الليل، أدوّر فيه درب ومسار!

أدور في داخلي مدري وش اللي حصل

واسأل، أنا داير لوحدي أو الكون دار؟

اسأل، ومفتاح هذا الليل ماله قفل

جدار مظلم، وخلفه ليل خلفه جدار

تتأمل اعضاك كيف النبض فيها خمل

كيف اصبحت حمل فوق الحمل فوق الحصار

يحاصرك خوفك الآمن بليا خجل

ماكنك اللي رسمت العمر شمس ومدار

وفتحت للعابرين من المواجع أمل

واهديت لاحلامهم نبض ونفَس وازدهار

هذا انت، يسكنك هذا الارتباك الممل

لو تسكن الأرض، لو لك في سما الناس دار!

هذا المؤشر طلع، هذا المؤشر نزل

حمَّاك تستوطن اطرافك مبيت ومزار

صداعك اليوم نصفي، باكر بيكتمل

تنفسك كن مابينك وبينه شجار

وحيد في عزلتك ماكن عندك أهل

رحمتك يارب من يوم الحشر والفرار

يارب عبدك شكى لك حالته وابتهل

راضي بما تكتبه ماله بحكمك خَيار