صدفة كأن الشوق يحكي مع الشوق

وارواحنا قبل الملاقا تطارى

صدفة وكان السوق مشغول بالسوق

والناس في دوامته ماتجارى

صدفة لنا عنا مسافات وفروق

فجأة نصير بركن منسي خشارا

والقلب كنّه يشرب الوصل ويذوق

من دون موعد للقا وانتظارا

اقول: روحي لك مسامات وشقوق

وتقول: روحي لك طريق ومسارا

برفوق ياصالح على العمر برفوق

وقف وعطني من سنينك نهارا

جاذبني اطراف السواليف في ذوق

واكذب وقل: مابك حزن وانكسارا

ولو شفتني من جد ضايق ومخنوق

قل: سبة الزحمة يمين ويسارا

وان شفت نعناع الحشا اصفر ومحروق

قل: تو روحك يكتسيها الخضارا

تذكر وش اكبر همنا قبل مانفوق

من خدعة الدنيا وحلم الفقارى

نصعد دراج احلامنا للسما فوق

نرسم طموح المرحلة ونتبارى

واليوم صار العمر سارق ومسروق

راح اجمله في صمت دون اعتذارا

تهدي " هديل وريم* " منك اعذب الشوق

واقول انا: وصل سلامي ل " يارا * "

ماكن في وجه الزمن دم وعروق

جينا حيارى فيه، رحنا حيارى

كنا نبي من وقتنا عدل وحقوق

صارت علينا حقوق، صرنا أسارى!

مدري متى نرتاح انا وانت ونروْق

ويغدي لنا عند الزمان اعتبارا

كأن بين أيامنا والفرح عوق

أو اننا نطرد وهم باختصارا

لـ صالح القرني عندما تخون المواعيد وتجمعنا الصدف!