(صوت)
الو:
يمه......
والله يا عبد الله ماسمع..
الكبر ياوليدي شين..
الكبر خلاني ماسمع..
(صدى)
من يقول الكبر يمه عذاب العمر
من يقول الكبر ياجنة العمر شين
الكبر ياكبيره زاد قدرك قدر
ولبسك ثوب عز رصعته السنين
من عرفتك وقلبك للأمومه نهر
من عرفتك وروحك للطهاره معين
يمه ياشمس الحياة بداخلي
يمه يامعنى وجودي
يارضا ربي علي
يمه يامسكي وعودي
من سقيتي هالحياة بداخلي وابتل عودي
ردت انفاس الحياة لهالجسد وانساب دمه
وكل ماعشبي نما طاحت على يدينك حدودي
وانحنى لرضاك ريش الذل وعيونه وفمه
ياهديل النور في دمعي وتسبيحة سجودي
يالرضا اللي كل ماهزتني ذنوبي أضمه
يمه .. يمه
ياعظيمه..
ياحنونه..
يمه ماشفتي وليدك...
في غباه وفي جنونه
يوم حاول يجمعك..
في ثرثرة دفتر غبي ..
يقدر يخونه
يمه آآآه...
كل ماجيت اكتبك فوق الشفاه...
ذاب صوتي ...
ورد في حلقي سكوتي...
واحترق ف شبر ماه...
مدري ليه الشعر لاجيت اكتبك يمه يسافر
مدري ليه الصوت لاغنيت لك بالحيل يصغر
والعن الحظ الردي وشلون يمه سرت شاعر
راس مال احساسه المجنون تنهيده ودفتر
كنت ظن ان الشعر ياطيبه كل المشاعر
يكبر بعيني وانتي اكبر.. واكبر.. واكبر
الو:
يمه ...
كل ماحاولت ادور لك معاني بين الاسما ...
اكتشف في كل مره ...
انك اغلى وانك اسمى....‍‍