ماغاب زولك هذا انا اسولف معك

ولا نسيتك هذا انا عايش معاك

ادري انقطع صوتك ولكن اسمعك

روحك تناديني ولو تسكت شفاك

ياللي رويتي دنيتي من منبعك

وازهر ربيع العمر واشرق في سماك

ياكثرك بهالقلب لو جيت اجمعك

قبل الزمن يسرق ملامحك وبهاك

تدمعك لحظات الوصال وتدمعك

روح الاماكن في زعلك وفي رضاك

ويشتاق نعناع الحنين لمرتعك

للصبح صبّك في عيونه واحتساك

كم قلت لك: ما أجملك ما أروعك

وكم قلت لك: محدٍ ملا قلبي سواك

وكم قلت لك: ورد الجناين يتبعك

تتفتح زهوره وتروى من نداك

وكم قلت لك: ما أزهدك ما أقنعك

وكم تكرِمين وتسعِدين وماكفاك

يانقش في جدار العمر ماينزعك

مر السنين المقبلة حتى لقاك

سبحان من كمّل وصوفك وابدعك

وعلاّك من فضله ل فضله واصطفاك

واختار لك أعلى المنازل يرفعك

كأن في أعلى المنازل مستواك

لاينشغل بالك ولا شي يوجعك

مازاد شي في غيبتك الا غلاك

بس الحياة اصغر من اظفار اصبعك

من يوم صرت انا هنا وانتي هناك

ياليت يوصل لك كلامي واقنعك

كيف اجدبت روحي بعد ظلك وماك

وكيف انحنى غصن الأماني، يفجعك

مشهد ذبوله كنّه يقبل ثراك

والله مدري كيف قلبي ودعك

هو حي بعدك أو ترك روحي وجاك

يارحلة العمر الجميلة ماسرعك

ماسرع بداياتك وماسرع منتهاك

ليت آخرك ياليت يشبه مطلعك

ماتذبل ورودك ويترمل شذاك

حتى اذا حبيت يوم استرجعك

ماتضيق بي أرضك ولا يعتم فضاك