يابحر جده مات حلمٍ بنيناه

على سكونك وانت تبنيه فينا

ومات الحكي اللي في شفاهـ

ـك قريناه ياليتنا يابحر ماقد قرينا

وياليتنا درب الهوى مامشيناه

وياليت ماطعنا كلامك وجينا

ياما رسمنا الحلم وياما محيناه

على سكونك وانت تضحك علينا

وياما من دموع المواجع سقيناه

ولا جنينا الا العطش في يدينا

وياما شعلنا الشوق وياما طفيناه

من خوف لاامواجك تحس فينا

يابحر في شاطيك حلم بديناه

وان كنت ناسي يابحر مانسينا

قلت الفرح باكر يجي واحتريناه

وجينا لقينا همنا يحترينا

في ضحكتك عفنا الزمان.. ونسيناه

واثر الزمن داري بنا مادرينا

لا تحسب انّا يابحر قد قويناه

نضحك عليك ان كان قلنا قوينا

يابحر.. هذا حلمنا اللى هويناه

من قبل لانحيا معه مات فينا

ويبقى السؤال المشتعل ماطفيناه

الى متى.. والهم للحب مينا..