أسباب فتح الباب سيرة سببنا

أوهام يأتي من سببها عدينا

سار القلم يا بو محمد وشبنا

واليوم ما رد الفوايت علينا

بأرباعنا ياما وياما قصبنا

من حول ضان وناب نوق سمينا

وياما على شقر الجزاير طربنا

شقر سماويات تنقل أيدينا

وياما على جزل العطايا وهبنا

وياما رفعنا النفس عما عطينا

ويا ما على جرد السبايا ركبنا

وقلايع فوق المسارج خذينا

وياما على ملح الفرنجي تعبنا

وياما على فرج وهيج بدينا  

وياما بها من فرج ريم سببنا

ووعول في روس الشخانب ثنينا

وياما على غصن الصبايا لعبنا

نلوي على سمر الذوايب أيدينا

وياما من الشهد المصفى شربنا

من غصن غضات الصبايا روينا

هيهات يا عصر مضى لو ندبنا

هيهات وين اللي مضى عاد وينا

اليوم من تعديل الأيام شبنا

وباكر نخليها لمن مقتفينا

يا خيبة الدنيا ولو به طربنا

يا بو محمد تقل ما شفت شينا