حي الجواب وحي من هو يعزين

حيه ثمانين ألف وألف عددها

حيه عدد ما ناح ورق البساتين

حيه عدد ما ناض بارق رعدها

حي الصديق اللي شفيق يمالين

بابيات في صفح الطلاحي رصدها

يذكر لي أن الصبر قوله يلهين

والصبر مرموني وريقي عقدها

صبري دفنته في زيارة ببيرين

متعلق بحد السهل من سندها

باح العزا يا صاح صبري غدا وين

لو درت عندي ذرة ما تجدها

والله دين القطع دين بثر دين

وحياة من هو بالثماير بندها

دين صحيح وكلمة الحق تكفين

الله يكفي شر من هو جحدها

لو من حلب للهند لشام للصين

لابواب مصر لباب نجد بلدها

تأتي نساها في زهاها مزايين

كل النسا ياليت وضحا بعدها

فيها خصال وافيات من الزين

وبها محاسن ما حصينا عددها

ما حاكت الغطروف بالمنطق الشين

ولا قط بالخملات وكد وعدها

ولا عاتبت بالهرج الأقصى والادنين

ولا على الجيران عضت بيدها

ولا ارثت شن صار بين الفريقين

ولا وسوس الشيطان واكثر نكدها

وان شافتن مغتاض قامت تسلين

مثل الشفوق اللي تلهله ولدها

بنت الرجال امخالط عقلها الزين

روايح الريحان ريحة جسدها

يا حجي ذي حجنا بين زامين

مسك وزباد، وعطر شاه نهدها

جتني عطا ما سقت فيها تثامين

شيمة فهود كل من جا حمدها

للضيف لطفين وللضد قاسين

وجيرانهم ما أمرحوا في ضهدها

ما سقت فيها غير خمس وتسعين

أصايل والكل تسبق بيدها

يبري لها من نقوة الجيش سبعين

وتسعين وضحا ضابطين عددها

يا سين يا أم عقاب ياسين ياسين

يا شبه عنز الريم ترعى حدها

يحا جي أن اليوم لي قد رعامين

مثل الخلوج اللي تبين لهدها

ما انسى عشير في حياته مصافين

ما دام روحي ما لجت في لحدها

يا غصن موز ناعم بالبساتين

اللي كما بيض القميري نهدها

وجدي عليها وجد من هم مساجين

متحسر يشرب كرابة كمدها

أو وجد من خلوه ربعه مقفين

في رهدة البيدا، وفارق نجدها

أو وجد مطعون على القلب رمحين

وعن لذة الدنيا يأس من سعدها

أو وجد شيهان شهر من شياهين

قصت سبوقه بأشهب الملح الادها

أو وجد مظهود بدار السراحين

عند الدروز اللي عن الدين سدها

لكنهم كفر عن الدين مقفين

وادري بيان ما خفي من وردها

من واهجي الغيظ رنوا مساكين

من فوح لاهوب يشوي كبدها

ومن لامني يبلى بجن الفراعين

وما زال بالدنيا يعيش بنكدها

وصلوا على المختار سيد النبيين

بين حدود الدين واثبت عمدها

صلوا على من نور الحق تبيين

محمد المختار ما ادوي رعدها