هيه يابرق الحيا ياللي خيالك شامي

زد وانا مع زود براقك يزود اسروري

رايٍ اعتقده وهو ماهو بشي الزامي

مير ابا اشارك زعم لو ماطلبتوا شوري

يارحيم ياولد عمّي جرحت اصيامي

احسب انك عاطفي وآثرك شاعر ثوري

تشتكي تمويه لكن التحدي حامي

ولو معرفك زين قلت محمد الفيتوري

كل بيت من القصيده فيه حقل الغامي

ماسلم منها لوانه كبر راس اظفوري

واضحه للي يعرف النقض والابرامي

التحدي لب والشكوى غلافٍ صوري

والحقيقه جغمتين اتبل كبد الضامي

وانت تشرب صافي الما لك ثمان شهوري

لكن اسبح فالخيال وعالم الاحلامي

ابحر رحيم وعوّد بندر بن سروري

واخذ من عندي هديه وانت رجل اعصامي

واعتذر لك بالبدايه كان شفت اقصوري

الهوى يرغي تحت نجوى كرم واحلامي

برّكنه بالخطام لوائل الكفّوري

وظهرت ف اهل الهوى ثقافة الافلامي

إن دحمته قال :" نوبربلم" وقالت :سوري"

وانتهت موضة " خذي واعطيني الارقامي

واصبح الموضوع يارحيم تجاوب فوري

وكان عندك شك بكره مر سوق اللاّمي

ومرّ بوتيك "الاميرات " وريناد " وجوري "

شف بعينك لا توكّل في طلبك محامي

الموصّى مثل زندٍ قدحته ماتوري

ومن تجذّى عن لزومك ماعليه ألوامي

ناقة المرّي تخالف في يد المنصوري

عش بعصر السرعه اللي صار شدّ لحامي

شايلٍ من كل خير وشر حملة لوري

وشيٍّ امنوّل له اسم اصبح بعشر اسامي

واتفق راي الديمقراطي مع الجمهوري

واختلط حابل بنابل واسفرَه باظلامي

بهت واطلعني تناقض هالزمن من طوري

ومن على احساسه بنت هوج الرياح اكوامي

جِلف لو يحفظ كتاب الشعر للدينوري

والعمى ماشرَه عليه اشره على المتعامي

لو انا مغنيني الله في جميع اوموري

والزمن تجريب يارحيم ودرس نْظامي

جدد افكارك معه ويصير فحصٍ دوري

وارم صوتٍ يقعد اللي ف الشعيب انيامي

وكان ماسمْعَوك عوّد للدعا الماثوري

ناسٍ اغناهم تقول افقر من الحجّامي

وهو يحط من الذهب في كل ركن اتجوري

زبدة الموضوع اخذها والسلام ختامي

وانت قرمٍ نص قذلاني ونص قبوري