ركبت سيت الحمر طرز الثمانيني

الموتر الي رجح بالقلب ميزانه

دورت حذافه بسلفٍ على الديني

وهز البساتم عمود اكرنك ذرعانه

وغذى كويله بوابين البلاتيني

والكهرباء بثها الشاكوش عجلانه

لفتر حدر الغطاء ماشوفه العيني

يوزع الكهرباء من خانه لخانه

وفي وسط الأسلاك يمشن الشياطيني

للبوجي الي عذاب البلف نيرانه

بلف الهوى لختلف مع بلف بنزيني

يثور وسط المكينه عج دخانه

وليا إشتغل ثورت روس الشكاميني

أنخاه ويرد لنخوات شكمانه

على الذي مشقيٍ روحه ومشقيني

الي عيونه تشادي عين شيهانه

وساع انقضى من حساب الليل ثلثيني

سريت انا الجمس للي خابر أوطانه

ساعة وعدها لصار الناس ممسيني

في وسط برٍ يسرك شوف ريضانه

ابطيت منها ونار الشوق تكويني

شفقٍ على شوفها والبنت شفقانه

منلتقي كود من حينٍ إلى حيني

وجاب الله الفرصة الي غاب شيطانه

وزان الملاقى وقرت بالغضي عيني

والساتر الله ولي الكون سبحانه