يسعد صباح الكل مدري مسا الخير

وشحالكم وشحال كلاً وحاله

يامرحبا يا ذا الوجيه المسافير

ترحيبةٍ تاخذ من الما زلاله

من قبل مابدا ما حسبت المخاسير

ماهمني لجنه وترشيح آله

دام الشعر يكتب من عوير وصوير

يالعنبو من لا يجيد الجزاله

للبوح روح وللمعاني تصاوير

وإن جا قصيدي ختمه إمن الوكاله

ماني من اللي يقبل ختوم تصدير

جن القوافي لا بقاني أنا له

أنا هنا لعيون كل الجماهير

كلّي فدا الجمهور .. كلي حلاله

من ساحل عمانٍ ليا حد خرخير

ومن الجنوب الحد لأقصى شماله

أمكّس الجمهور وحفر لهم بير

هدّاج تيما لا بغينا مثاله

وأنحر لهم إمن العطايا مغاتير

أصايلٍ من روس جود وسلاله

وإلهم غضاره من حليب المصاغير

والعود الأزرق إيتمثنى الفواله

وإلهم معزّة عز وإعزاز تقدير

ولْكل غالي له معزه لحاله

وإلهم في قلبي فيّة الصبح وعصير

وأنا لهم شاعر يجيد إرتجاله

شاعر وربعي بالمواقف مناعير

منهو بغى شيٍ تحقق مناله

نارد على حياض المنايا مناصير

أهل العلوم الغانمه والشكاله

أكبر دليل..إصغيرنا توّه إصغير

يسكر أمور المرجله للثماله

ما قلتها زودٍ عليكم وتقصير

كل القبايل تستمد الأصاله

مبداي باللي دبّر الأمر تدبير

ماغيره اللي أتكل بتّكاله

أنا هنا حامل على الكف تقرير

حامل على متن الرساله رساله

فيها المعاني كامله بالتفاسير

فيها أمورٍ تعتبر مستحاله

فيها سؤالٍ دايرٍ به دواوير

هذا سؤالٍ ما يبيله إطاله

نذرٍ على ذي ما يبيله تفاكير

اليعربي وش به من العز داله

ليه العروبه تنثني للخنازير

ياقوّها في عيد الأضحى نذاله

أضن فهمتوا دون أية تبارير

وياعزتي للي ماعنده كفاله

بس اسمحولي الصراحه هنا غير

أبا اتكلم في امور البطاله

مابه بطاله لو تطول المشاوير

أقسم بربي مابه الا حثاله

هي البطانه تحت عرش الهوامير

محدٍ يشوف الشين والهم عاله

الا قليلٍ مالهم بالدنى سير

أستثني القلّه وأشيد الإزاله

والحمد لله ماعلينا تقاصير

في ظل أبو متعب أساس العداله

أنشهد إنه من خلاصة تباشير

وكل الشعب فدوه لميلة عقاله

ناقف على شانه حشود وطوابير

ياحي أبو متعب وياحي فاله

لو أمدحه ما تكتفيه التعابير

يالله عسى عمره يزيد إستطاله

ياوين أبو الطيب ووليم شكسبير

وأبو العلا وينه وشوقي وآله

وين الفرزدق .. وين حشد المشاهير

معي أنا بيقدمون إستقاله

لنّي ما أجامل .. مارجيت الدنانير

أنطق كلام الحق صدق ودلاله

لو ما أصير إبهالزمن سالم الزير

يانعنبو من لايطوّر مجاله

وإختامها من قبل لا روح واسير

صلوا على محمد أمين الرساله