قبل الغياب و قبل علم التباطي

وما كدر الخاطر وما هو مصافيه

وقبل الحروف اللي عليها النقاطي

اسمع من التعبير صافي قوافيه

من الرصيد اللي أقول احتياطي

جزل ٍ سمين ولا تجيه التوافيه

هذا الزمن ماله وهوب و معاطي

وإلليا عطى يعطيك لمت شلافيه

يجيك بردٍ مثل برد الشباطي

وإلا سموم الصيف وإلا سوافيه

اسمع كلام اللي من الوقت ساطي

ما هاب من وقته نكاده وما فيه

مع جمعة العالم خذيت اختلاطي

عرفت خلق الله كريمه وهافيه

ما ني من اللي في كراسي الشواطي

قدم البحر جالس ويجمع صدافيه

مخطي ويتعب له جموع الخواطي

من يتبعه يطلب له الله يشفيه

ولا لي مع أهل المال أي ارتباطي

لا ني غني المال ولا ني بحافيه

أنا من الدنيا يزيد اشتياطي

وتزيد لوعاتي وما بي مخفيه

ودي على العلياء ولا أشقى البلاطي

محلى الشفاء لا شك ودي أشافيه

الرأس يبقى رأس عكس المواطي

عكسه معاكس له تماماً منافيه

الحق واضح ما يغطيه غاطي

ووسط الخفايا شيء تخفى خوافيه

ونوب أكتم الصرخات خوف انحطاطي

العز مبداء لي ولا ني مجافيه

أخاف لا تحسب عليّ إنهباطي

عليّ تحسب في حساب المسافيه

كثر الجفاء ما زاد في اختباطي

ومطلوب بالي والله إني لوافيه