للصمت في بعض المواضيع حكمه

وما للحكي في بعض الأحيان داعي

كم عالم ٍ عيا يكفية علمه

وكم جاهل ٍ قلبه مع الوقت واعي

بعض الكلام يصير للقلب لطمه

وبعض الكلام يصير للقلب ناعي

وبعض البشر ما ينعرف كيف سلمه

متلخبط ٍ ما يتعرف له طباعي

هذا الزمن يا ناس يا صعب فهمه

عجزت لا ألقاله مع الناس ساعي

درب ٍ طويل وليل يزداد عتمه

زادن به الخطوات كثر المساعي

لا بد ما ينقص من الحمل حزمه

ولا بد ما ينشد عن العلم راعي

ومن ما عرف للوقت يزاد شتمه

زادو عليه الناس مكر وخداعي

كل ٍ يحاول به وكلٍ يعزمه

لين ٍ يطيح إبها يليا دواعي

وإليا وقع مافية يا هيه رحمه

يحكم عليه الوقت حكم الضياعي

ومن يعرف حساب الزمن شد عزمه

لو جاه من كدرى زمانه وجاعي

يحسب لدنياه القشيره بهمه

يحسب لها من قبل شين المذاعي

ومن قبل لا يزداد فالوقت همه

ويلقى بها من كثر همه مراعي

ويا كثر ناس ٍفيهم النفس زمه

ما تعجبه لو كان منه السماعي

متعلي ٍ فوق البشر فيه قمه

يحسّب الدنيا بكثر المباعي

ويحسّب الدنيا بمالٍ يلمه

ويحسبّ الدنيا بجمع المتاعي

ما يدري إن الموت يلقاه خمه

في وسط قبره كنه تراب قاعي

ومسكين من يمشي بدرب المذمه

يبقى وسط ربعه قليل المطاعي

يذوق من وقته هموم المسمه

ويشوف بإنه عن هوى الناس ضاعي

ويعيش في حلمة ويغشاه حلمه

وهقوته بان الناس بالحلم تاعي

والناس ما تعلم ولا الناس يمه

ولاناس ما تدري عنه لو يجاعي

والناس ما تنفعه لو ضاع دمه

ما فكروا به لو يزيد إندفاعي

كل ٍ يعيش بدنيته لو يضمه

هم الزمان ولو يصيبه رواعي

والحر ما يفتح للأيام فمه

ولا عاد ينفع غير علم الشجاعي

والصمت في بعض المواضيع حكمه

وبعض الحكي ما فيه يا ناس داعي