أرضي...وعرضي...وفوقهن راية الدين

ثلاث فيهن عزتي والشهاده

من دونهن ترخص مكارم عزيزين

وبعزهن سار الفتى للرياده

يادار..يادار الفخر لاتونين

جرح الغدر يادار هذا ضماده

ان كان هنتي في فؤاد الرديين

يادار نور الكون يخفي سواده

ان باع واطي بالمنيات شارين

ترخص رقابٍ عند الأجواد ساده

تاريخنايادار باقي اليا وين

ماهو بنارٍ عايشين بسماده

تاريخنا ذات الصواري وحطين

والخندق اللي صرف الأيام عاده

تاريخنا يادار ! تاريخ .. تدرين

ماهو صفير الطايره من زناده

حاميك ربك من سهام الشياطين

مادام رب البيت حامي عباده

لاتشتكي يادار... ناسٍ مصلين

دعواتهم يادار فيها وكاده

هذاك وان غاب المطر ما تجفين

يسقيك ربك بالهنا والسعاده

يادار فوق الخيل صاح السلاطين

على دروب الموت لالركاده

شرابتٍ للدم... بالحيل ضارين

عج الرمك يادرا لعيون غاده*

بنت الكرام اللي تسيد المزايين

أصيله الجدين مابه رباده

ماهي بدار الغرب ماهي بكّين

ولاعاش منهو بالرديات كاده

هذا السبب يادار لا لا تخافين

مادام عرق الجود ينبض مراده

يادارنا من خلقت الأرض للحين

ماغير دين الحق شايل مهاده

خليتها للوقت وأنتي تعرفين

لاصار قولي مايجي بالأفاده

راوي قصيد ولا تقولين شاقين

هذا الشقا يادار للقلب عاده

هاذي خواف النفس ليهٍ تلومين

منهو بكا والدمع يادار زاده

أرضي ... وعرضي... وفوقهن راية الدين

ولاحمام الدار ( بلفور ) صاده

* غاده : هي الفتاه الجميله