الله يقطعك يالجوال وارسالك

يومك تجيب الرساله والغثى ليه

مكتوب بعد السلام وشلونها حالك

تعال صفر الدلال اليوم ممليه

وصلت انا منزلك ولبيت مرسالك

دعوة رفيقي ترى ماهي بعاديه

قال اقلط الدار يافال السعد فالك

ياحي قرم لفانا ماخلق زيه

جلست في مجلسه والاجودي سالك

في عرض الاجواد مدري ويش داعيه

فلان والله ترى مايساوي نعالك

واحذر من فلان طبعه يشبه الحيه

وفلان لو تعطيه كل الزين ماوفالك

لو تنفعه رد لك المعروف بالسيه

قلت اقطع الهرج الله يقطع اشكالك

نفسك على غيبه الاجواد مبليه

تغتاب عمك ومره تحتقر خالك

سوالفك كلها يافلان سلبيه

ياشيخ ماني اخوك ولا اصغر عيالك

أستأذنك ياردي النفس والنيه

مع السلامه ترى مشروب فنجالك

لاتنتظر من جنابي صوبك الجيه