ماجور ياهاجس هل الشعر ماجور

بالساحه اللي قربت من أجلها

للشعر قيمه والرياده له عصور

رساله يفخر بها من حملها

معذور ياللي ترثي الشعر معذور

الشاهق اللي حدروه بسهلها

الجزل مات وهاجس الفكر مبتور

والهزل باغتها و نوخ جملها

ساد الفضا والصحف والعلم مخبور

طلاسمٍٍ بأفكار منهو جهلها

قالوا التطور بالشعر شي مجبور

ونساير الموضه بشتى سبلها

يعني كما الآتي وركز على الدور

وتصير بأفلام القوافي بطلها

لاصرت شاعر تطمح تكون مشهور

وتاصل مكانة شاعر ما وصلها

غير وخالف كل منهج ودستور

وأن جتك موجات أنتقاد أحتملها

وياصرت في حفله وآماسي وجمهور

صيح وهرج بالقصيده وشلها

وأن صفقوا بإعجاب وإدهاش وسرور

أطوا القصيده وثم دور بدلها

وحاول تخفف نبره الصوت بغرور

والنرجسيه لو قدرت أنتحلها

بتشوف غضات الصبا صف طابور

ومن قالت أمدحني قوام أرتجلها

مثل الغلا لوحه و الأشواق طبشور

أو أجمل أزوال الضبا مع هملها

شنطه غيابك قفلها اليوم مكسور

وعقبك رياح البعد بعثر سملها

لأجله يزقزق كل طير على السور

وقطعان نحل يستقر بنخلها

كذا كذا تبني عمارات وقصور

وأترك هل الشعر القديم بفللها

يامال فرقى العين ياضيعه الشور

ضيعه و واقع هالزمان أختزلها

قال الحداثي يرسم الحرف بالنور

وأهل النبط تشكي عوامل محلها

ليت الأماني لا طلبته على الفور

تتحقق لروح تعيش بأملها

ليت الزمان يدور ويدور ويدور

ونعود لآداب الجدود وجزلها

ومن كان ضدي يسمع العلم مشكور

والبيت يحسم بالقصيده جدلها

العز في بيت من الطين مهجور

أخير من زيف القصور ونزلها