سلام يامن عم الأجواد جوده

كم خيّر يكرم ومن جودكم جاد

سيرتك مع كل العباد محموده

ياطيب المبدى وياريف الأجواد

لو عدّت أفعالك ماهيب معدوده

ماعدّها راوي وكاتب وقصّاد

قولٍ صناديد النشاما شهوده

ما ينقده ياسيدي كل نقاد

ما فيه من وصفك توصل حدوده

أطيب هل التوصيف من ينصف الماد

لاكن شيٍ في ضميري يروده

من وصف كساب الثناء راع الأمجاد

لو هاجسي ما كل شي يقوده

لاكن في سلطان يمشي وينقاد

هداج تيماء اللي تداحم وروده

تضربه الأمثال في بر وبلاد

من جاه يشرب منه كنه يزوده

جمه بحر ما ينقصه كل وراد

ولا خيالٍ ما ترزم رعوده

وبلٍ يهل بدون بارق ورعاد

مسمّرِ صدره وبيضٍ خدوده

متعزّلٍ بينٍ على روس الأشهاد

يمطر وساكرةٍ ذعاذيع نوده

سحٍ عدق ضافٍ على الحضر والباد

يحي الهشيم اللي رعى السوس عوده

من عقب سيله كل الأنعام تزتاد

خالقك ربٍِ ماش حالٍ يكوده

لأمة محمد كلها عون وإمداد

يالله طلبة عابدٍ لمعبوده

ياواحدٍ مالك شريكٍ ولا أنداد

تعز أبو خالد وتبقي وجوده

شوفه ربيع ونور وأفراح واعياد

ويبقى علمنا شامخٍ في عموده

للمسجدين ولأرضها درع واسناد

في الأمير/ سلطان بن عبدالعزيز"رحمة الله"