يامير جينالك من البعد عانين

جينا على دعوتك ياطير حوران

في لازمك نمشي على العسر واللين

لو كان من دونك اجبالٍ ووديان

سمي جدك ياطليق الحجاجين

امشاهدك يجلي عن القلب الاحزان

يابن الملوك اللي على المجد وافين

حرار نجد اللي على الخيل فرسان

يامن على سيرة هل الدين ماشين

يامطوعينٍ كل طاغي وشيطان

انتم ذرى الاسلام ماضي وهالحين

وانتم سند من ضده الوقت وانهان

يامير لو قلنا بمدحك دواوين

والله مانوفيك حقك ولو كان

امرددٍ يامير من بين الاثنين

من بين ابوك وبين جدك اكحيلان

ومن بين عمان وخوالٍ مسمين

ساسك حشا مافيه ميله ونقصان

عنك الردى ابعد من الجدي ضعفين

وابعد من سهيل اليماني اليا بان

والله عطاك من الجزيلات ثنتين

مخافته ومراقبه سر واعلان

والثالثه تواضعك للمساكين

ماغرتك دنيا خرافات والوان

يابن الفهد ياعز الاقصى والادنين

ياغيث ربعه كان وجه الزمن شان

عبد العزيز اسمك حفيد العزيزين

نسل الفهد عريب جدٍ وعمان

يامير ماحقك من الشعر بيتين

حقك على راسي وعيني والامتان

دعيتنا وحنا لشوفتك شفقين

وزيارتك تبقى على الصدر نيشان

اهداء الى الامير عبد العزيز ابن فهد