أنتي و أنا ( عشق ) وبقايا حبيبين

عاشوا على كسره من رغيف الأمال

برد الفراق اللي ( يشق ) البطاطين

ماخاف من ربه يعذب بالأطفال ؟

ذكرى الطفوله تاخذ أفكارنا لين :

نغرف حنايانا شقى طرده اللال

كانت طفولتنا بدايه غريمين

غيره وخوف وحال يستنكر الحال

كنتي وطن يحضن عيون البزارين

وأصرخ ترى مابي يشوفونك عيال

ياهي خْربت وأصرخ تراني مسيكين

حبك سكني صار في الدم جوال

تسحبني الدمعه ولا أبغى تشوفين

أقفيت من دمعٍ على الخد همال

شافتني ( أمي ) ثم عطتني ريالين

وأزبن ريالي وأترك أف جيبك ريال

ونروح نركض قصدنا ل الدكاكين

كنا ملكنا وقتها كل الأموال

قلتي أحبك قلت أنا وش تقولين

الكلمه هذي تهدم بيوت وجبال

ماهوب ف الشارع حياتي تحبين

نرجع وقوليها ( كبيره ) بموال !!

يالله رجعنا نشتري العلك بعدين !!

خلاص مابي شي حبك على البال

ألحين وين أنتي وأنا بأول البين

ماكانت إيديني مع يديك صلصال ؟

رحتي ولكن صدري إزداد تخمين

ياذا الرحيل مفصلٍ فيك تفصال

ألحين عمرك صار سته وعشرين

وأدري بيوم ولادتك عيد شوال

أبحتفل بيني وبيني وبتجين

طيفك يجيني من فراقك ولا زال !

لكن أنا وأنتي بقايا حبيبين !

عاشوا على كسره من رغْيف الامال