انهاب فيك يادار الغلا لمريبه

وانجيك جبر شايلني جناح الغيبه

انهاب فيك يا دار الغلا القديمه

وانجيك لجل فى طوحت خيالي ديمه

وانوح كي انجي لجباك نوح ايتيمه

اللي مالصغا عاشت حياه عطيبه

وانحوس فى خلاك الشين ومواهيمه

وانحنلك حنين الطفل للترجيبه

وانشيل النظر شورك اتبان عتيمه

سواد ليل تركبنى مخاوف ريبه

ومنك اتعاود يا الدار عديمه

العين من هطيل الدمع وتشخشيبه !!

انهاب فيك يا دار الغلا وانتاقي

وانجيك جبر تجبرنى عليك اشواقى

وانحط غير ما نلقى عزيز ايلاقى

ويفرح ونا نفرح معا ترحيبه

ارباك خلو ,, لا حادر ولانك راقي

كساد من صغا وقتك ومن تقليبه

انهاب فيك يا دار الغلا وانكابر

غريبه اللي حامل بلاك وصابر !!

الها الوقت ,, وين انجيك جيت عابر

نظايق اتجى بينى وبينك غيبه

واطلالك ايبانللي اتقول مقابر

الدايم الله لا نك ذرا لاهيبه

انهاب فيك يا دار الغلا وانرايف

وانجيك غير ما نرجع الا بحسايف

عليك وعللي ما اللهم شى صايف

من يوما مشوا منك اوجوه حبيبه

ابقيتى خلا خالي ,, ربيعك صايف

عليك هابه ريح الجفا الرهيبه

انهاب فيك يادار الغلا لمريبه

وانجيك جبر شايلنى جناح الغيبه